|
|
Articles: Drama | తెలుగు విలువల ఉగాది - Editor
| |
'ఓలే... సిన్నగుంటా.. రాయేబేగి... టైమైపోతున్నాది' అని అరచి చిన్నకూతుర్ని పిలిచింది. దాని ముక్కుపుడకను సవరించింది. తమ్మిట్లుకు లోలక్కలు అమిర్చి బిగించింది. వేలికి ఉంగరం తొడిగి, జడకుచ్చులకు బంగారు గంటలు రెండు కట్టింది. పాపిడిబిందు అమిర్చింది. కంటెను మెడలో వేసింది. వడ్డానం బిగించింది. పెద్దకూతురూ ఇలాగే ముస్తాబయ్యి మొగుడుకోసం ఎదురు చూస్తోంది.
'నడిపి కూతుర్ని చదివించడమే తప్పులాగుంది. అప్పూ సప్పూ చేసి ఇంజినీరు కిచ్చి పెల్లి చేసాం. దేశాలంట అల్లుడంట వెళ్ళింది. వస్తున్నామని కబురు... ఇంకా రారు. నడిపి గుంట (పిల్ల) ఏ యేళకు కంటబడతాదో.. ఏటో! అల్లుడు మహా కానివాడు - పండక్కి నాల్రోజులు ముందు కలిసిరావద్దా.. ఏం ఉద్దేగాలో... ఏటో... దేశంకాని దేశాలు - అమెరికాలు గిమిరికాలు... నా బొంద...' అంటూ మనసులో గొణుక్కుంటోంది ఆమె.
రైతులు కేకలు - 'ఏమే... ఏటిసేస్తన్నారర్రా...
మళ్ళా తొంగుండి పోనారేటీలు...'
రైతు భార్య : 'ఇదిగిదిగో... రడీ... రడీ... వస్తన్నా... వస్తన్నా'
(పెద్దాడు అరకపట్టి చాలు తిరుగుతున్నాడు. ఇనమార్లు దుక్కి అయ్యింది. నారుమడికి తూరుపు దిక్కున, ఒక మూలన రెండడుగుల కైవారం లో ముటీ (నవధాన్యాలు కలిపిన విత్తనాలు పిడికిడు) జల్లడానికి నమూనా నారుమడిని (తాత్కాలికంగా) తయారుచేసివుంచాడు రైతు)
తబుకు (ఇత్తడిపల్లెం)లో పూజసామాన్లతో ఆమె - ఆడపిల్లలిద్దర్నీ తోడ్చుకొని వచ్చింది ఆమె మెడలో చిన్నరావి ఆకు మాదిరి పుస్తె వేలాడుతోంది. రైతు పల్లెం అందుకొని, భూమి పూజ చేసి, తనచుట్టు తాను ముమ్మార్లు మడి చెక్కలో తిరిగి, తూర్పు దిరిగి, పడమరకు దిరిగి, దక్షిణనకు దిరిగి, ఉత్తరకు దిరిగి, దిక్కుల మూలకూ దిరిగి భూమినీ ఆకాశాన్నీ మొక్కి -
'ఏమోయ్... తేవే.. పుస్తెలు. ఆటితో గీకి చాలుపోసి, ముటీజల్లి, ముందుముందు మంచి పంటలిమ్మని భూదేవతను బాగా మొక్కుకోవాల బతిమాడుకోవాల... రైతు'
ఏరు దున్నడం ఆపి పెద్దోడు వచ్చాడు. చిన్నోడు పక్కన నిలబడ్డాడు. అమ్మిలద్దరూ ఒంగోని భూమికి దండమెడుతున్నారు. రైతుభార్య పుస్తెలను పసుపుతాడుతో సహా మెడలోంచితీసి రైతు చేతిలో పెట్టింది. పుస్తెలందుకొని, దాని బంగారు సూదిమొనతో ముటీమడిలో ఇనమార్లు ముమ్మార్లు చేతితో చాలు పోసి దున్ని, మన్నుకు దండమెట్టాడు. భర్త బతికుండగా రైతుభార్యలు తమ మెడలోంచి పుస్తెలు బయటకు తీసే సందర్భమిదొక్కటే. పుస్తెకూ వ్యవసాయానికి ఉన్న ఈ సంబంధాన్ని తెలుగు సంస్కృతి ఒక్కటే విశ్లేషించగలదు. భారతీయ జాతేతర భాషేతర భాషణలకు... ఈ సందర్భ సాంస్కృతిక విశిష్ఠతలు ఎలా అర్థమవుతాయి!
ఇంతకీ ముటీ జల్లడం ఐపోయింది. ఈ ముటీమడిలోని నవధాన్యాలుపై నీళ్ళు చిలకరించి - ఈ నమూనా నారుమడి చుట్టూ ముళ్ళ కంపలతో దడి (కంచె) కట్టి... ప్రతీ దినమూ... విత్తనాలు మొలకెత్తినాయా లేదా అని గమనిస్తూ వుంటారు. బాగా మొలకెత్తితే ఆ యేడు పంటలు బాగా పండుతాయని నమ్ముతారు.
ఈ విరోధి నామ సంవత్సరంలో - పంటలే పండుతాయో, భూముల్నే 'సెజ్'లు ఎత్తుకుపోతాయో! వైరుధ్యాల విషమ విషాదాల విరోధి హెచ్చరిస్తోంది ఏదో...
| Read 1 Comment(s) posted so far on this Article!
| |
|
|
|
![](../images/spacer.gif) |
Advertisements |
|
![](../images/spacer.gif) |
![](../images/spacer.gif) |
Advertisements |
|