టైటిల్ మళ్ళీ మాదే: ధోనీ
ముంబాయి : ఇటీవలి ఇండియన్ ప్రీమియర్ లీగ్ పోటీల్లో తీరిక లేకుండా ఆడి అలసిపోయినప్పటికీ ట్వంటీ - 20 ప్రపంచకప్ ను గెలుస్తామని భారత క్రికెట్ జట్టు కెప్టెన్ మహేంద్ర సింగ్ ధోనీ ధీమా వ్యక్తం చేశాడు. తన జట్టు సభ్యుల ఎంపిక సమతూకంతో ఉందని, టైటిల్ ను తప్పకుండా నిలబెట్టుకొని తీరతామని డిఫెండింగ్ చాంపియన్ భారతజట్టు కెప్టెన్ ధోనీ పేర్కొన్నాడు. జూన్ 5 నుంచి ఇంగ్లండ్ లో ప్రారంభమయ్యే ట్వంటీ - 20 ప్రపంచకప్ పోటీల్లో పాల్గొనేందుకు భారత జట్టు శుక్రవారం ఉదయం బయలుదేరి వెళ్ళింది. ఈ సందర్భంగా ధోనీ మీడియా సమావేశంలో మాట్లాడాడు.
దక్షిణాఫ్రికాలో ఇటీవలే ముగిసిన ఐపిఎల్ మ్యాచ్ లలో తమ జట్టు క్రీడాకారులు ఆడడం తమకు మరింతగా కలిసివచ్చే అంశం అని ధోనీ అన్నాడు. ఐపిఎల్ మ్యాచ్ ల ద్వారా తన జట్టు సభ్యులు అంతర్జాతీయ మ్యాచ్ లలో ఎదురయ్యే ఒత్తిడిని తట్టుకునే సులువులు ఆకళింపు చేసుకున్నారన్నాడు. 'మా జట్టులో చక్కని సమతూకం ఉంది. ట్వంటీ - 20 ప్రపంచ కప్ టైటిల్ ను మళ్ళీ దక్కించుకోగలం' అని ధోనీ పేర్కొన్నాడు.
మీడియా సమావేశంలో పాల్గొన్న ధోనీ అలసటగా కనిపించాడు. వరుసగా మ్యాచ్ లు ఆడుతున్నప్పుడు అలిసిపోడం నిజమే అయినా ఐపిఎల్ మ్యాచ్ లు తమకు చక్కని ఎక్స్ పోజర్ ఇచ్చాయన్నాడు. తమ జట్టు సభ్యులు సామర్ధ్యాన్ని పెంచుకునేందుకు ఐపిఎల్ మ్యాచ్ లు దోహదపడ్డాయని ధోనీ పేర్కొన్నాడు. ప్రపంచకప్ కు వెళ్ళే ముందు ప్రీ టోర్నమెంట్ శిక్షణ తీసుకోవడం అవసరం లేదని ఒక ప్రశ్నకు ధోనీ సమాధానం చెప్పాడు. ఐపిఎల్ మ్యాచ్ ల ద్వారా తమకు మంచి అనుభవం వచ్చిందని, శిక్షణ తీసుకోవాల్సిన అవసరం లేదన్నాడు.
Pages: 1 -2-
News Posted: 29 May, 2009
|
